نه واخت بیر یاشاماق دوشونسم..._سعادت جاهانگیر
يئيگون(جمعه) اسفند ۱٣٨۷ - ٢٧ فوريه ۲۰۰۹
چوخ یورولموشدو... اوزگون-اوزگون گوزگونون قارشیسینا کئچدی. ساچلارینی ییغماق ایستهدی. رنگی ساپ ساری ایدی، گؤزلرینین آلتی کؤلگهلی...اللرینی اوزونه آپاردی، سولغون رنگلری سیله جک میش کیمی...
بو حوزن وئرن رنگلری...گونشین غروب واختی گؤرموشدو. بیر ده کؤهنه رسملرده... عؤمرون قیریقلاری کیمی کسیک-کسیک قالان...هر ایل بیر آز-بیر آز سارالان آغ-قارا رسملرده...
دریندن آه چکدی... گوزگونون اوزرینه دومان چؤکدو. عکسی گؤرونمز اولدو. او دومانین اوستونده بارماغی ایلا بیر رسم جیزماغا باشلادی. رنگلر دییشدی، جیزگیلر جانلاندی...
“هه... ایندی گؤزل”- پیچیلدادی اؤز-اؤزونه. ایسته دیگی رسمی آلمیشدی. بالاجا بیر قیز گؤردو. گؤزلری پار-پار... ساچلاری گونش رنگینده...تئللرینه تاخدیغی چیچکلر رنگبرنگ. اونون نغمهسینی ائشیتدی. چیچکلرین آراسیندا آری کیمی ویز-ویز اؤتهرک اوخودوغو نغمه نی...
سونرا اونون دورنا قطارینا یئللنن کیچیک آغ اللری...
هاوادان آسیلمیش قایالارا دییب عکس-صدا وئرن گولوشو...گؤی قورشاغینین یئددی رنگی کیمی...
گولومسهدی. او قیزی نه واختسا گؤرموشدو. چوخدان...لاپ چوخدان...
سونرا گوزگونو سیلدی. احوالی دوزلمیش، اوزو ایشیقلانمیشدی...
...چوخدان بئینینده دولاشانلاری یازماق ایستهدی. بیر کاغیذ گؤتوردو...
هارادان باشلایاجاغینی بیلمهدی. او آدامی خاطیرلادی. بیر آخشام ساعت 9-10 آراسیندا دوراقدا دا تصادفن راستلاشدیغی... گئجیکمیش قطاریندا برابر یول گئتدیگی آدامی... گؤزلنمهدن ایکیسی ده عینی ژورنالی آچمیشدی اوخوماغا. سونرا دا اوخودوقلاری عینی یازینین موزاکیرهسی باشلانمیشدی. حیرت ایچینده دینله میشدی اونو...بیر یازیچیدان، ادبیات بیلیجیسیندن دویمادیقلاری...
“یازی موسیقی اثرینده اولدوغو کیمی بللی بیر ریتم دویغوسو وئرمهلی”.
“...کیلیم ناخیشی کیمی بوتونلویه، خاطرده قالان بیر نئچه جیزگییه صاحب اولمالی...”
...داها نلر، نلر...
“نه دئمک ایسته ییر؟” “یوخسا او ژورنالین یازارلاریندان اولدوغومو بیلدیگیندن...” “بیلسه ایدی، هئچ اولماسا، کیچیک بیر ائیهام ووراردی.” ساکیتلشدیرمیشدی اؤزونو.
قطار دوراغا چاتاندا چانتاسینی گؤتورموش، قالخاندا ائشیتدیکلریندن نیطقی توتولموشدو.“یازیلارینیزی یئنه اوخویاجاغام”- دئمیشدی آدام گولومسهیهرک. بیر آنلیق دونوب قالمیش، نه دئیه جه یینی بیلمهدن ترک ائتمیشدی واقونو...
آدینی بئله بیلمه دیگی بو آدام کیم ایدی؟..اوز-اوزه راحتلیقلا دانیشدیقلاری آندا دئییلن سؤزلرین اونا عونوانلاندیغینی دوشونونجه قیپ قیرمیزی اولدو. دئمک کی، اینجهلیکله، قلبه توخونمادان، اینجیک سالمادان چاتدیرمیشدی سؤزونو.
او قدر “درس”دن سونرا “یئنه اوخویاجاغام” دئمک نه یین ایشارتیدی کی؟..
سانکی بیر گئجهنین قارانلیغیندان ایچینه ایشیق کیمی دوشوب قالمیشدی او “ادعالی” آدامین سؤزلری...
چوخدان بئله ماراقلی بیر آداملا قارشیلاشمادیغینی دوشوندو...
او گون قطار نئیه گئجیکمیشدی، همین آدامی گتیرمک اوچونمو؟..
بو، بیر تصادف ایدی؟ حیاتدا “تصادف” دئییلن شئی وارمی یعنی؟
ایندی یاز گؤروم، نه یازیرسان... اصلینده، آدام حاقلی دئییل می؟.. ریتم... قلبین دؤیونتوسو، توخونان، دویغولاندیران، یاشانان سس... کؤنول چیرپینتیلاری. کؤنولسوز یازیلان اثرین نفسی، دویغوسو اولماز کی...
او دا پیانو کیمی کؤکدن دوشدوسه هئچ... حکیملر بونا دئیرلر “آرئتمیا”. یعنی اورک ریتمینین پوزولماسی. دیاقنوزا باخ!..اؤز-اؤزونه گولدو...
عؤمروموزو بوتون یاشاماق ایستدیک. تام “بیر کیلیمین ناخیشلاری کیمی”. نه قدر زور، دئییل می؟..دونیانین بیر نؤمرهلی رسامینین وان قوق اولدوغونو دوشونورم. “گون باخانلار”ایندا اؤز یاشام تابلوسونو نئجه چکمیشدی...یاشیلیندان ساریسینا کیمی. بیر یاندا آلت-اوست حیاتی، او بیری یاندا گونش دولو چیچکلری. اطرافیندا کیمسهنین آنلامادیغی آجیلارینین، آغریلارینین، عشقینین رنگینی آنلاتمیشدی چیچکلرینین دیلیله...بلکه بونا گؤره کؤنول قویدوغو “گون باخانلار”ای اونون ایکینجی عؤمرو اولدو. ابدی عؤمرو...
بونلاری دوشونورکن...نسه یازاجاقدی آخی. یئنیدن باشلاماق ایستهدی...فیکیرلری قارماقاریشیق اولدو...
آتیللا ایلهاندان سون زامانلار اوخودوغو بیر شعری میزیلداندی:
نه واکیت بیر یاشاماک دوشونسم،
بو کورتلار سوفراسیندا بئلکی زور،
عاییپسیز،
فاکات ائللریمیزی کیرلتمدن
نه واکیت بیر یاشاماک دوشونسم،
سوس...
هئچ نه یازمادی، کاغیذا اوچ نقطه قویدو...
http://www.azadliqciragi.org/node/93
